Archivio digitale veneto

Jacopo Morello, In nome de Gattamelà

 

 

In nome de Gattamelà, so pare e so figiuolo, e de la columbara col concistruolio, e tutta quella bella brigà que vivanto de contentezza galde in vita biata co gi agnoli e arcagnoli Mechiele e Gabriele, Tubiolo e la so pessata.


[1] Per sta scrittura, fatta per man de mi sotto scritto noaro spublico de tutto el territuorio del Pavan, e de drio ghe lagherò po el me segnale, el serà dischiario, desponio e cazzò in le regie a tutti del roesso mondo, de cristiani mariè e da mariare, grande, picoggi, que ghe è e que ha da vegnire, d’inchinamaimentre al dì del gran finimondo, chi porrà e vorrà o per desgratia s’archiaperà aldire o slenzere sto spatafio pin de veritè, legalitè, utentico, approvò e confremò da i sottoscritti huomeni da ben, dottore, zuese, sinichi e gran spelucativi, qualmentre l’ano daspuò el quarantanuove col so menchiesemo per anteguarda, del mese e otto dì inanzo che vegne sant’Antogno, quel dì che i Culata fé costion co i zugolari per la Rosa de i Rosegnoti, sotto l’olmo di Fregolè, a pe del fossò di Bolzonatti, presente barba Pestolese de Cervello fo de sier Squarcina, sier Ruosolo di Niespoli figiuolo de sier Brochetta, mistro Torcolò di Forcon, sier Desfragolò Castraporciegi di Forconati, testemugni chiamè e preghè.

[2] El fo in Pava un homazzon, que no haea d’homo nomè la lome e la ciera, longo, fè conto, co è un becce de spago, aguzzo de celibrio co è na ceola, pi destegolò la smalmoria que fava sotto battauro, que se chiamava per so derta lome Desconzò di Sbusenazzi del quondam sier Trevella; que no giera né bissa né osello, né carne né pesce, né bruò né graniegi, né dolce né garbo, né fresco né salò, né cru né cotto, ma na certa mestura, una missianza, un impiastrazzo, pi imbregolò da intendere que n’è le riegole: ’l iera, con serae a dire, la merda di spalivieri, que no puzza e manco sa da bon.

[3] Questù fo buttà fuora in falo da la snaturalitè, per riso e smaravegia de chi el cognesse, que, quando so mare el fé, mi cherzo que la volea pissare e que el poverhom caisse zo e desse del cao su l’óro del boccale, e que per questo el so celibrio sea mezo sfrantumò.

[4] St’hom da ben stasea a Pava, puoco lunzi dalla berlina, qué el so piadenetto e la sorte el fié andare a stare invelò, azzò que ’l se poesse speggiare e guardarse de no rivare un dì col so cao in la busa de mezo.

[5] Sto cristianazzo haea habù sempre mè alla so vita un gran cottale, un desierio de doventar dottore e savio con puoca spesa e manco struggio; e quando ’l iera pezzenin, que ’l passava per su la piazza e ’l cattava qualche squarzafuogio, on giera stò revoltò entro salcizzon, luganega o fromaggio salò, el lo portava a ca’ e struggiava su quello.

[6] El dì soradito, que fu una domenega de sera daspuò cena, quando el celibrio va svolanto de sora da i caviggi, sentando a usto un caldirotto de melestra, con fa un bracco un levoratto, ’l andé drio a na brigà de valenthuomeni, que giera asiè per cenare in lo bruolo de sier Zan Antuogno Struzzolò, que stasea a Pava al bo de fuora vegnanto da Mortanton, a pe de no so que nosselari.

[7] El primo de sta bella compagnia si giera barba Slibrale di Scoffonati, hom da ben e timon ben derto de tutta Pava e Pavanatuoria. A pe de ello sier Cecon di Scarpellè. Drio a questo Tofano Lasagnotto. In stirola: barba Ceola di Roviersi, sier Giavarina Regonè, Menego Descosio, Dezzulò di Ravaniegi, Piero Petton, Lenzo Maùro, Scoffon Rebeccò e barba Storto di Furegotti, tutti huomeni dottorè in le slettre e manezi de sto monto, e con autoritè de adottorare an chi i volea igi; qué mi a’ g’ho vezù la so licintia e registrò int’i miè slibrazon el so stremento, fatto de man de Filuorio Beccalò, que in quella botta, que fo de l’anno del desdotto senza menchiesemo giera noaro e sganzeliero de messier Snicolò Pezzenin, que fo scapotagno sora i schiopettieri al tempo di Toischi.

[8] El sora menzonò Desconzò Sbusenazzo, sapianto l’autoritè de sti huomeni, se g’apresenté denanzo, parte per cenare, parte per voler essere adottorò in la rason e partica de poere e saere deffendere quanti villani, que per tempo a vegnire foesse accusè de haver danezò in tegnir d’altri.

[9] Ello, de prima intrà, el vosse cenare, e quando el fo bonamen mezo cotto, el se levé in du piè e dé una destendua al collo, que ’l parse un occonazzo, que volesse cazzare el becco int’un paggiaro, e se alzé su le maneghe del gaban e se dé una guardà intorno, que ’l parea el becco mal guardò; e po spué na botta con sì bel muò, que ’l parse el culo de la me cavalla, quando el schittola per bramositè del stalon; e per haver la gratia del dottorò fé sta percantola a i soraditti barba Slibrale e sconsegieri, que de buona vuogia l’ascolté.

[10] “ El m’è doiso, e sì cherzo fremamen, sletran saccente e detraque ponto in iurio dottore, e valenthuomeni in tegnir la staela derta e cognoscere i grani dal bruò, un gobbo da un derto e un bon da un cattivo, que a’ sapiè molto benissimo el quare quia e a que muò e con quanti suore e stente e giazzaruottoli el se desconisse la sonza de gi huomeni, inanzo que ’l se posse fabricare un cervellissimo imprendeole, co è quello de Desconzò, que a’ son mo mi, que sea laldò la torre del Bo e messier san Crescintio.

[11] A’ saì an bona parte de vu se mi ho struggiò tutto ’l tempo della me vita, e s’a’ posso anare an mi de brigà co gi huomeni que sa quel ch’a’ se pò saere. Qué la sé mo così: que Pava, senza de sto fusto, sarae na mandria de cavere senza el so becco.

[12] E perqué a’ no ve smareveggiè del me grand’anemo, c’ho habù a vegnire denanzove per volere an mi l’hanore de poer portare na centura dalle maggiette soraindorè, a’ ve priego, ascoltème una partesella delle me vertù grandenissime e, con v’habie ben impio el cao delle me saccentarì, con la vostra bona conscintia a’ sententierì se ’l ve pare que a’ mierite d’esser adottorò, e se de sti huomeni el s’in catta inte ’l polverazzo. Qué, s’a’ vorrì dir el vero, a’ confesserì que ’l serae un gran mierito, e sì sé un gran peccò, que a’ no me posse fare un molon almanco per siè mesi de l’anno; perqué a’ ho tante scintie in mi, e sì son sì scintiò e sorascintiò, que tutti quigi, que me desse de lo naso in lo culo, supianto un molon, se scincirave an igi de muò, que i porae tegner scuola a i dottore. E ascoltè se ’l è vero.

[13] Mi, de prima, el me basta l’anemo de tegnir brigà a un magnaore, per sbricco e valenthomo que ’l supie, i biè agni delongo; e chi no ’l cre, faghe spirintia sora la crenza. E no ve para miga puoco, questo; qué ’l se sa que purassè muore per no poter magnare.

[14] Per zugar po de man, a’ incago mistro Bernardo, qué, s’a’ ho in man du cavaluotti, a’ i farò doventare quattro marchitti in manco d’un que.

[15] Per tegner un aseno per la coa a bella forza pi grande de mi, guardème in la ciera.

[16] A’ m’arecuordo po haver smorzò un gran candellotto con un scarcagio alla prima.

[17] Per goernar po la me roba, e hom de puoca spesa, dìllo vu, qué mi no g’he miga el peccò della sprodigalitè. E aldì se ’l è vero. Una fià giera in letto amalò co la fievera ferda, e sì me besognava tuore un siropo; e mi per no impigiar fuogo a’ me ’l scaldié in me’ le gambe, e po el sorbî, que ’l me guarì de fatto.

[18] A’ son po un hom de gran credito, qué ho zà cattò in crenza da i miè amisi paggia, legne, scuelle, toagiuoli, farina, aseo e mile fatta de besenelle, de muò que a’ g’ho fornio la massaria senza spendere un marchetto.An. que v’in parsestre?

[19] No ve porae po mè rivar de dire del me gran cuore, qué alla fe’ a’ he pi cuore mi, que n’ha na vacca gravia, que ghe n’ha du! E aldì.

[20] A’ me recuordo zà que, per no anare in preson, qué, con disse quellù, na botta a’ giera stò tolto in fallo, e mi, pi tosto que anare, a’ ghe laghé la gabanella e muzzié via per piazza, que tutti i botteghieri sbattea su i balcon e se la riea, e mi con un anemo da lion a’ me salvié in braghesse, que a’ someggiava un galliotto muzzò da i Turchi!

[21] Homo po che, per colorire una bosia que la pare vera, a’ no porto invilia a que avocatto se vuogia. E sì ghe son sì ausò, que ’l pare que a’ no posse dire una veritè se lomè in fallo; qué le bosì me fiorisse in bocca a mi. E questi sé huomeni senza parengon, segondo mi.

[22] De desbutar po una defferintia in Pallazzo a’ no darae luogo a Teto Levio pavan, qué una botta uno venne in custion co na femena dal peccò, que ella disea que la g’haea fatto carezze e dò piasere, e sì no l’haea pagò, e quellù disea: “Se no t’he dò dinari, a’ t’he dò ben tanto del me, que, co te ’l vendessi, ti gh’in caveriessi an quattro cavaluotti.” Mo mi defendié la tosa, e sì fié sentintiare quellù, perqué a’ ghe provié que roba no giera denari e, no supiando dinari, no poea far pagamento; e de quel che ’l paghé, la femena compré tanto pesse, e mi l’andé aiare a mangiare, que per segnale a’ ’l frizessene co vuolio struccolò fuora d’una lume e farina avanzà da un impiastro da bognon. E quisti si è huomeni da dottorare, que a i besuogni fa e sa fare, e sa insegnare a fare del besogno vertù col so inzegno spelucatuorio.

[23] Per cavar po fuora del tasco con parolle malitiosette i bezziti di miè clientiegi, no ve digo altro, lomè que negun no se vanterà mè d’andar via da mi sutto, se ’l me deesse dare solamente du bagatin da comprare del persimbolo.

[24] De rengar po a’ no vuogio altri testemugni, che le vostre reggie adesso; e sì ho tanto poere in telle me parole, e tanta calamitta a pe de mi, que purassè fiè quanti dottore sé in Pallazzo me sé cursi drio a mi per imparare qualconsa da mi, que i someggiava tanti osiegi intorna a na zuetta.

[25]  De slettere po no faellè, qué el portié d’in la panza de me pare, quando a’ nassî; e sì ho vezù pi libri mi andagando in piazza, que sette dottore stagando a ca’. E se no volì mo creere que mi supia un hom da esser stampò, e hom que sappia del saere per ello e per i suò amisi, ve prego que no vogiè dottorarme, se prima no me dè i punti e le letion, con se fa a quigi que se vole adottorare. E po, se mi a’ no ve riecito e se no ve descoso così poliamen, que romagnerì storniegi, son contento que me mandè a ca’ pi bo de quel ch’a’ son vegnù denanzove. E con questo ve fazzo un bel inchin, aspittando quello, que me responderì, con pi vuogia que n’aspetta la suppa un gazzolatto ”.

[26] Daspuò sto zanzume, invelò presente barba Slibrale e sier Scoffon e compagni sora menzonè, parandoghe la domanda honesta e in consonantia della rason, e vogianto fare quel che è suolito a fare quando se fa un dottore, ghe disse que i volea que ’l ghe saesse dire que lettera sé el manego d’una muola; e quale è quel anemale que se ingravia col becco; e da que tempo de l’anno el Bo è pi reondo; e quale è la cason que ’l porco, co ’l se pigia, el sbrega così fieramen e la piegora no dise gnente; e quale è la prima consa que se fa daspuò que ’l se ha pissò; e quale nasce in prima, el ravo o el ravanello; e quale è quella consa que someggie pi alla mittà della luna; e qual è el pi savio homo al mondo e el pi matto; e que vuol dire que le celeghe va d’agnora de salton; e perqué se volze indrio i lievore, quando i can ghe corre a cerca. E ste conse ditte i ghe le dié per so punti e sletion, e ghe dié termene tutto un dì a desponirle, que daspuò i ghe darè resposta se i lo volea dottorar o no.

[27] Mo el sora menzonò Desconzò no vosse termene negun, mo da hom compio de fatto que l’have habù inanzo, el riecité su agno consa con tanto bel muò, que ’l no fo negun invelò que no creesse que ’l haesse magnò merda de zoetta, così ben riecitélo agno consa e de prima scarpellaura.

[28] El respondé que ’l manego d’una mola si è un S strupiò; e que la cavera si è quella que s’engravia col becco; e che quando el bo se slenze sotto la coa, in quella fià ’l è pi reondo que tutto ’l tempo de l’anno; e que perzóntena el porco cria sì fieramen chi ghe mette le man adosso, perqué el se dubita de la spesa, sapianto no haer altro de bon que la so carne, e la piegora tase, perqué la se cre que se ghe vuogia se no tosar la lana; e que la prima consa que se fa drio el pissare el se dà una stretta a l’armario da i pitti; e que el ravo e ’l ravanello sé friegi nassù tutti du int’un portè; e que el no ghe sé consa al mondo que somegie pi alla mittè della luna que l’altra so mittè; e que el pi savio homo del mondo si è quelù, que dentro del so cuore se ten fremamente d’esser matto spazzò e de n’esser gnente; e quelù è matto de fatto, que se ten d’essere el pi savio che quelù; e ello solo chiamo contento, que no ha celibrio né dinari; e le celeghe va sempre de salton, perqué so mare no gh’insigné mè caminare; e i lievore se volze indrio, perqué i no g’ha gi uogi in lo culo.

[29] I qual punti el ditto Desconzò Sbusenò con tanto ficaccio, presintia, arte aramoria, presto tosto e netto riecitté, que i sora menzonè barba Slibrale e gi altri suò compagni, vogianto render mierito rasoneole a un cervielissimo ben mauro, que tanto ha struggiò, que ’l sarae peccò e fallo marzo a no darghe tutti quigi hanore que ’l mierita, i fo continti tutti a na ose, per el so spriviliegio, que ghe fo lagò dalla massaria di Sbrogiafiga, laoraor del segnor Snicolò, e gran valenthuomeni al tempo delle guerre, e de riede in riedolo se ha destendù d’agnora la so utoritè, de tretorarlo, no que dottorarlo; anchora que sier Mittimale disea que na torre sola ghe basterae dal mezo in zo, mo el fo per malevolientia.

[30] In colision barba Slibrale, Zopello Regunò e gi altri sconsegieri ghe dé le so sante ose. I no ’l vosse ballottare altramen, perqué ’l iera un hom sì groppoloso, que igi haea paura de no s’intopare in qualche consa que i fesse po caire zoso per la scala. Mo barba Slibrale, scapotagno e primo de gi altri, se levé in pe e ghe metté una zuogia in cao d’un sbarro d’altrighe diganto ste belle parole: ” Pigia, fardello, sta corona e salvela inchina al tempo que vegnirà la mitria de carta ”.

[31] Sier Cecon di Scarpellè ghe metté un tondin d’inghistara in deo, diganto a sto muò: ” Chiappa sto anello e tiente a mente que ’l è in luogo della cuorda que te ligherà può’ an i punsi, quando i te darà do strapè de corda, se te no sarè hom da ben, sapiando dottorò ”.

[32] Sier Tofolo Lasagnoto ghe dé un baso diganto: ” Questo serà in luogo de quello que te darà quella stomegosa que te torrà per mario, que, co te l’habi, fariesi alzàr la balestra del to usso, que te no la butti zo col cimiero ”.

[33] Barba Ceola di Reviersi ghe metté una resta d’agio al collo diganto: ” Tuo’ sta colaina e tiéla inchina que se farbica la caena que te tegnerà, que te no trarè le zoppe ”.

[34] Sier Giavarina Regonò ghe dé una scovolà in sul gaban, diganto: ” Tiene a mente che questa sé in luogo delle scuriè, que te haverè co i te fazze imparare el portante intorno el Pallazo de Pava, s’te no zugherè netto in sto to dottoramento ”.

[35] Sier Zopello tosse una piena co no so que avanzàura de aseo e vuolio, e ghe dié la benision fagandoghe un aspeghese e diganto: ” Arecuordate che questo vuolio è azzò que te te fazze buona guarda que i sorze no te roseghe i calcagni ”.

[36] Sier Menegale Descosio e gi altri tutti, a na ose criando: ” Viva viva el nostro noello dottorazzo! ”, i lo metté su na barella, in luogo d’un carro trionfale, con barba Scaviggiò que andasea inanzo supiando dentro a un corno de vacca in luogo de piva strazzà. [37] I lo menà a casa soa con tanto vin in lo cao, que ’l se può creere que, se ’l harà buttò fuora, ’l harà bu da beere per siè mese delongo, perqué, andaganto a ca’, el supié in un pozzo e l’aqua è deventà bon vin da masseria.

[38] E mi, Ruffiolo Revoltò, que fo de sier Dessavio di Repezzè, noaro spublico, stripulié el so stremento, e sì el darè a chi me pagherà.