Archivio digitale veneto

Pasquale dalle Brentelle, I perpuositi de favellare

 

 
 I perpuositi de favellare
 
 
 
 1
 Slainava la Leziera a Bertevello:
 chi vuoi haer del ben per na stemana
 dal barbiero se lave e faghe bello.
 
 
 2
 E quellù c’haer vuole el mese bon
 scanne el so porco, che ten la brigà
 in legria con gi ossame e coi baldon.
 
 
 3
 E chi vuoi haer ben ’n anno compio
 se marie desvegrando quel terren
 che po i fastubi si ghe trotta drio.
 
 
 4
 La Doviga de Bortolo Mazzocco
 disea: “Sperientia manten i cason,
 che ven deroinè dai gnoranton”.
 
 
 5
 E Baldin Tortolato saea dire:
 “Baldezza de paron capel de matto,
 quando altri sgnica ti no te la rire”.
 
 
 6
 Né miego né meesina a gi amalè,
 c’habbia del male que sea de quel bon,
 xe per fargi guagnar la sanitè.
 
 
 7
 Chi perde na tosazza da mal fare
 guagna e no perde, disea Trincanato,
 perqué on furega tanti è mal bitare.
 
 
 8
 Per sto roeso da la cima in fondo
 a’ vezo ch’agno consa ha el so remielio.
 Chi no ’l ere a muò d’un ravo xe reondo.
 
 
 9
 Fo tegnù dal commun de Sborauro
 e da le vicarì de Padoana
 che ’l pissar contra el vento n’è seguro.
 
 
 10
 Co fa la luna, dise el barcaruolo,
 va’, frello, in mare e co l’harrà el reondo
 per n’haer male ficcate in lo porto.
 
 
 11
 Ha lagò scritto sul fondo a un tinello
 Tuogno de Berto che in agno sason
 no sarà ricco chi sea poverhom.
 
 
 12
 Mengo Chioato fegiuol de la Trese
 ha col cortello insegnolò na pria:
 chi sta ai so campi si no muzza via.
 
 
 13
 Diseva Giomo de Sandro Bocchin
 a cierti contain imbriaghè
 che l’acqua muogia e ch’imbriaga el vin.
 
 
 14
 De viegio che sboldega per ca’
 el fastubio maor se cre che sea
 la cagaruola che ghe tuole el fià.
 
 
 15
 In te de gi agni che corre el besestro
 i filuorichi xe de pinion
 che i ladronciegi guagnerà el cavestro.
 
 
 16
 Un gnocco e gnoranton, che no sa dire
 el fatto so, val, co disea Griguolo,
 tre bagatin, xe un muso da far rire.
 
 
 17
 Fo pinion de Malgara Barella
 ch’agno tempo si ven chi pò spittare,
 ch’agno derto ha el roerso, e n’è noella.
 
 
 18
 Chi fa del male (a muò d’un c’hea robò
 na cavera) sospietta ch’agnon diga
 o ’l mostre: “Vîllo, frieggi, quellù è stò!”.
 
 
 19
 A un fillò Duozza, seror de Bolpato,
 desea: “El primo anno i mariè s’abbrazza,
 el segondo i putieggi i sta in la fassa,
 el terzo s’ha un mal anno e bel sogato”.
 
 
 20
 Gi ammalè tutti c’haverà gran male,
 o colghè sora el letto o mal in pe,
 contra el desiero i lagherà el boccale.
 
 
 21
 Chi no g’ha cuore no sarà mè bon
 d’ovrar roella e spa, de sbravezzare,
 d’anar in fra i schiopitti e battagion.
 
 
 22
 Chi no g’ha fatti, co disea Pittaro,
 ma zanzume, noelle e cagarì,
 tien la somiegia d’un can da pagiaro.
 
 
 23
 Siè conse ten la ca’ in slegrantion,
 co slainava me nona Malgaretta:
 baffa, pan, uolio, vin, sal, compagnon.
 
 
 24
 Chi da per sì se lalda la faiga
 tuole ai vesini, co disea Galvan,
 e no val la so lalde na vesiga.
 
 
 25
 Fa’ conti spessi e ten longa amistè,
 diebiti paga per haer in crenza,
 e spindi con rason co te ghe ’n he.
 
 
 26
 Femene e pesce, dise Maccachiò,
 xe del contugno meggiore in la panza
 e de manco bontè da gi altri lò.
 
 
 27
 Chi d’agni vinti no g’harrà saere
 e d’agni trenta no g’harrà de guagno
 s’appicche, el poerin, disse un messere.
 
 
 28
 La monea, che reonda se ne va,
 sta al muò del servior co la beretta
 denanzo al Scapotagno o Poestà.
 
 
 29
 Fa’ grando el matto, te ’l farè maore
 de mattieria in lo cao, disea Fasuolo,
 e se mua de pinion chi guagna hanore.
 
 
 30
 S’te vuò far despiaser a gi anemisi
 (ma no se dê per slieza da crestian)
 spietta sason d’irroegiarghe i bisi.
 
 
 31
 La mogier de Ventura Scavezzin
 a la so Duozza spesse fiè disea:
 “Menor fastubi ha el griso che la sea”.
 
 
 32
 La sale del magnare xe el petteto,
 segura dal veren pi dei saore
 xe la polenta de l’hom poereto.
 
 
 33
 El scon esser caldura in te l’istè
 seanto fuogo Cagnuola e Leon:
 fremate al desco col boccal a pe.
 
 
 34
 La zenderation si se faiga
 per hanor, per amor, per scudazzon,
 slaina Lisandro fegiuol de Marcon.
 
 
 35
 Perde gi amisi chi dà roba in crenza,
 va in deroina, no guagna monea
 e del so mercantar ne vé somenza.
 
 
 36
 Fa’ dei piasere e spiettane po an ti:
 se in un o in du va de coltura el ben,
 in t’i diese, in t’i vinti el furta al pi.
 
 
 37
 Chi drome no laora, e sì no guagna,
 e chi no drome e s’affaiga ben
 noriga i so fegiuoli e se manten.
 
 
 38
 “Frieggi, gran guagno vuol faiga assè,
 e senza affagni no gh’è ben legun”,
 disea Breato, degan d’un comun.
 
 
 39
 “Agno derto ha el roerso, agno sason
 el so porpio, agno consa el tempo vuole”,
 dise Borron che tagia le brasuole.
 
 
 40
 Per la monea d’ariento e la indorà
 se fa mali a megiara in le cittè,
 in ville robaminti e falsitè.
 
 
 41
 “Chi somena vertù la famia arcuogie,
 e chi vuol haer ben se ’l faghe ello”,
 diseva un preve denanzo al lisello.
 
 
 42
 A muò del fierro che frema i barcon,
 né mè in lo mar si noa, xe el poeretto
 grossolan que no sa la so rason.
 
 
 43
 Chi sta al coerto co ’l screvazzo ven
 lìgalo, frello, se ’l se va a bagnare,
 e co ’l se bagna e s’alde a lomentare
 dighe: “Matto spazzò, el te sta ben!”.
 
 
 44
 Diseva la Zannella a so fegiuola:
 “Tre conse mercantè le scon calare:
 femena, vin, polier da far trottare”.
 
 
 45
 E tegnia duro: “Tre conse è reale,
 se no falla la Berta Meneghela:
 uolio, fierro cavò, perchin el sale”.
 
 
 46
 “E tre conse dà guagni da minchion
 - l’anaseva digando ai fogolari -
 calcina, sabbia, piere de matton”.
 
 
 47
 Tre cose cerco che no vorrae vêre:
 calcagni sbrendolè, el destro burto,
 s’altri monte per sora a me mogiere.
 
 
 48
 Ocche in cortivo e femene al mercò,
 diseva Dario Grotto a Mio Morlacco,
 de zanzume e parole impina el sacco.
 
 
 49
 Chi cazza gi aseniegi e na poltrona
 se mena a cerca da mal far ha briga
 contugna e guagna duogie e gran faiga.
 
 
 50
 Lisandro Stradiotto me disea:
 “Fallo e nol dire, dillo e po nol fare
 el ben e ’l male che t’harrè da fare”.
 
 
 51
 Un bon massaro, che guagnava assè
 col so saere, diseva ai poltron:
 “Miegio è l’invilia che la compassion”.
 
 
 52
 A un c’hea fatto male e confessò
 disse Zappante: “O gnuocco, o gregolitto,
 in scrivaura mè fo el taser scritto!”.
 
 
 53
 Tre conse è prigolose da covrire:
 femena ingravià, na barca viegia
 e l’homo senza fiò che no pò rire.
 
 
 54
 Agnol Masiera d’un che mariò
 s’iera da viegio disea: “No sarà
 tutta soa la mogier ch’ello ha pigiò,
 seanto bella e quellù sberrozzà”.
 
 
 55
 Bel zanzume e ria vuovera, o brigà,
 disea Rocco de Maso Spolaore,
 Stuoteni inganna e i matti ch’è spazzà.
 
 
 56
 Frello, co te verè ch’un inviò
 te vaghe carezzando fieramen,
 cherzilo che ’l te inganna o t’ha ingannò.
 
 
 57
 Chi non vé l’hora de pigiar mogiere,
 dise Tita Giurin, stenta a so destro,
 se percura i malagni e ’l so besestro.
 
 
 58
 Chi sa donare, disea Megiorin,
 vende assè caro, se no xe villan,
 quel che pigia el donò da le so man.
 
 
 59
 Saer de poverhomo n’è priesiò;
 bella putana, poer de fachin,
 disea Pol Lovo, no val tri quatrin.
 
 
 60
 Chi spietta chi no ven e chi no drome
 sentò in letto, disea Lenzo Bin,
 chi serve e no fa furto d’un quatrin
 ha fastubii in lo cuore e mille anzin.
 
 
 61
 I puttiegi e ’l polame in tutti i lò
 si sconchigia la ca’, disea Pasquale
 che s’iera mariò dai Menegale.
 
 
 62
 Berta Brunella, mogier del Forlan,
 disea: “Chi ben e mal no pò soffrire
 a gi hanor pi stimè no pò vegnire”.
 
 
 63
 La Giacomazza de ser Mio Grapin
 disea: “Chi la sbravezza e no g’ha fatti
 co ’l gh’è da fare muzza co fa i gatti”.
 
 
 64
 “Agno femena è bona co ’l no gh’è
 chi ghe ten drio”, me disea Zacchello
 quando so frello si se mariè.
 
 
 65
 Bedin Garzotto disea: “Bon o rio
 marzo, frieggi da villa, vu verè
 can a l’ombria, bo a l’erba e verdi i prè”.
 
 
 66
 S’te no vuò, frello, far un bel maron,
 fa’ con te digo: femena né tela
 no pigiar al lusor de na candela.
 
 
 67
 Vuòtu far guagno assè? Contugna spesso
 in la faiga e spindi con rason,
 per lagar po dei cuofani de tron.
 
 
 68
 “Fa’ bona guarda che no viegna el male,
 ché bona guarda te ’l farà muzzare”,
 Perduocimo Galvan disse a me mare.
 
 
 69
 Iera un mormolaor in la me villa,
 ghe dissi: “Bàia primamen de ti,
 mormola po de gi altri, inchin de mi”.
 
 
 70
 A un ch’esser voleva alturiò
 ’n altro diseva, ch’iera poverhom:
 “Perten pi la camisa del zupon”.
 
 
 71
 Nale, che fo ingannò dai so paron
 in cierti conti, disse a un contain:
 “El pesce grando inghiotte el pezenin”.
 
 
 72
 “Col marzo suto e co l’avril temprò
 - Benetto Danfo me diseva - spietta
 crosette, fagie, gran fuor d’agno muò”.
 
 
 73
 De pi el diseva: “O duogia o sbaticuore,
 frello: se mazo rensce ’n hortolan,
 spietta purassè pagia e puoco gran”.
 
 
 74
 Da fame, fime, fumo, frare e femena
 da mala narration vardate, grottolo,
 s’te no vuò doentar un ranabotolo.
 
 
 75
 A Lenza che le viegie sbertezzava
 disea la Nadalina Fasolata:
 “Agno scarpa doenta na zavata”.
 
 
 76
 Ho imparò da sier Craudio dei Zordan:
 ai campi, in horto, s’ha la vi ferdura,
 daghe del sarto la ceccolaura.
 
 
 77
 Dise Agnolo Sgaregio da Tombello:
 se ven el dì de Nale in la domenega
 vendi i bo, contain, compra la melega.
 
 
 78
 Me disse an Mazzalovo da Treban
 che i videgale ch’è piantè in collina
 fieramen furta s’te ghe dè pollina.
 
 
 79
 Tre conse mal partie ho prevezzù:
 se ’l monte sea pi ricco che n’è el pian
 e se la levra fa muzzar el can
 e s’è ’l mario da la mogier battù.
 
 
 80
 A pe del desco me disea Chimento:
 “Se ’l sarà mazo suto e impolverò
 puoca pagia g’harron e assè fromento”.
 
 
 81
 Disea Ratio Gallina al me boaro:
 “Né quî de le cittè né contain
 lalde mè la mogier, cavallo o vin”.
 
 
 82
 Chi no s’imburta le man a far el fatto so
 Checcho dei Martinazzi, sbertezò
 da un contain che iera assè villan
 perqué ’l iera saccente e in t’agno lò
 da palain el ghe mettea le man:
5“No le se imburta col far a sto muò
 - respose - o frello fegiuol de Galvan.
 E chi no xe da far servisii bon
 mielita lome da ’n arzopoltron”.
 
 
 83
 Quatro conse sprefette
 Quatro sprefette conse a’ g’ho cattò
 su un slibrezzuolo che me fo donà:
 ’l vovo de n’hora dal gallo impollò,
 el pan del zorno que ’l è cosinà,
5carne de ’n anno del fegiuol del bo,
 pesce da diese grando e norigà.
 Cusì disea el filuorico sletran,
 che se guagnava con la sletra el pan.
 
 
 84
 Sora quiggi che no fa ben co i po’
 Cra, dise la cornacchia e repigià
 ten el so cra millanta fiè cigando:
 “L’istè che ven si me farò la ca’!”
 Arzonta ch’è l’istè, m’arecomando,
5la no s’impiensa. “Da per tutto è ca’”,
 par che dighe la matta cornacchiando.
 Cusì chi spietta el tempo e po el ghe muzza
 de male in male deroinò scapuzza.
 
 
 85
 Conse da muzzare
 Muzza, Briotto, da noci cason,
 da hosto che da fresco fa el mestiero,
 da na viegia puttana c’ha i berton,
 da vin de na spinà che sea leziero,
5da pan grosso e mofìo che no xe bon,
 da strope de mal legno, disea Piero
 dei Calzavara, e da bottazzo pin
 che fa de la graspia da piezo el vin.
 
 
 86
 Deparate da sti prigoli
 Per me consegio guardate, boaro,
 dal vento che fa male e da garbin,
 da bastonè de spin o cornolaro,
 da chi se lalda e no val un quatrin,
5dai ladroncieggi che vuogia el ponaro
 per esser impicchè po da Spadin,
 da quî che trogna, da gi fiabaore,
 da quî che dula per dar in l’homore.
 
 
 87
 Chi mè se contenta
 Mè se fa el cuzzo che contente un can,
 con faiga te insegni al Fiorentin
 perqué dagnhora se ten pi sletran
 col faellar gramego e col latin;
5servior che sastufe al Politan
 ha gran que fare con puochi quatrin;
 e co diseva Martinello Lovo,
 fa gran impresta chi ben cuose ’n ovo.
 
 
 88
 Qualitè del bon fromagio
 S’te vuò formagio che sea de quel bon,
 ten mente, contain, al fatto to.
 Co ’l sarà Arago per me pinion,
 frello, el mieliterà d’esser laldò.
5Largo, grosso, maor d’un polenton
 e viegio, da chi ha inzegno el ven comprò.
 Se ’l sgnica co cento uocchi, tento a man,
 to companego che ’l sarà col pan.
 
 
 89
 Qualitè de na bona mula
 Vuòtu na mula que sea de bontè?
 La testa da luserta la dê haere,
 collo de gru la penze in l’hanorè
 gamba de ragno bona la fa crere.
5Groppe slisse, norie, pine, streggiè
 volea che l’hesse Berto, me messiere.
 E de sta biestia, che mè no se stracca,
 la so panza reonda sea de vacca.