Archivio digitale veneto

Pasquale dalle Brentelle, Prenuostego snaturale

 

 
 Prenuostego snaturale
 
 
 
 1. I segnale de pioza
1.Co l’acqua te verè de la fontana
 da la busa cair grossa e maore
 screvazzo spietta un dì de la stemana.
2.Se gi aneruotti in piè se sbatte le ale,
 per la pioza che ven bita la tieza,
 diseva a i carraor barba Pasquale.
3.Se gi aseni a i terren frega la schina
 la pioza è chive: sotto el to coerto
 deparate e laora o carro o tina.
4.Co l’istè trà el schiantizo da bass’hora,
 boaro scozzonò, chérzilo a mi
 che ’l pioverà no vargherà tri dì.
5.E quando el bo se lecca contra el pelo,
 se ’l guarda in su che ’l par strolegaore
 pioza a sbesefo cairà dal cielo.
6.Se te verè, co ’l piove, i boatieggi
 e la Chiarina magnar inviò,
 contugnerà la pioza in t’agno muò.
7.Seanto in te l’istè gran scalmanella
 pi de la so sason e del doere,
 la doman darà zo pioza noella.
8.El cielo, co ’l ven dì, che sea rossin
 e se ’l se vé pi del doer stellò,
 te fa crer che la pioza è chì vesin.
9.De i cuorbi col bon tempo le ose stragne
 e le maore che s’habbie sentù,
 ten un deslubio d’acqua promettù.
10.An le cornagie che col ferdo ven,
 se le se bagna e tende a cornachiare,
 vuol che la pioza ne daghe que fare.
11.Se la gatta se lecca i piè denanzo
 e con iggi se stregia, o lava el cao,
 harron, né starà assè, pioza, e no zanzo.
12.Se la candela farà el capelluotto
 [e] inviò, frieggi, s’aldirà schioppare,
 un bon screvazzo cairà debotto.
13.Le gru che zole via da la so valle
 la prenuostega, e gi uossi rappezzè
 se i ne duogia, l’harron su le spalle.
14.Mosche che beche senza descretion,
 nuovole negre in l’aire somenè
 e la cima coerta a Ruvolon
 e a Venda mostra c’harron pioza assè.
15.Se l’osel ciga ch’è bon da magnare,
 quel c’ha d’Arago gi uocchi in su la coa,
 de la pioza el villan se dê guardare.
16.Co la sale in la zucca se desfà
 e i puorci porta o sconde pagia o fen
 e i polzi ponze fieramen, l’è qua.
17. Se salta e sberla piegare e castron
 e i ruospi laga da bass’hora i busi,
 el cielo arnuvolò con pioza harron.
18.Per sora l’acque de fime o palù
 la cesiola que se bagne l’ale
 in lo zolare, harron pioza puhù.
19.Se ’l tron col vento del levar del dì
 s’alde con quel del sol che va a ponaro,
 to’ la gabana, che la pioza è chì.
20.Gi osieggi che per miegio svolazzare
 le pime col so becco se regona
 ven a dir da la pioza harron que fare.
21.Vento da terra que supie inviò
 e tron que fa remor da miezodì
 farà muogio el terren e bagnò el prò.
 
 
 2. I segnale de vento
1.Se gi anaruotti el cao se ficca sotto
 de l’acque per i fime e spesse fiè,
 harron del vento, saea dir Pillotto.
2.S’te verè lampezar co ’l ven la sera
 dal lò del nuostro puolo on bita el Carro,
 sarà el vento in lo ciel cao de bandiera.
3.Se i dolfin c’ha in lo mar gobba la schina
 saltuzzerà per entro co ’l s’arquachia,
 el vento si farà gran deroina.
4.Co i gagi canta inanzo la doman
 pi de ose che i pò, spietta remore
 de vento e a cerca mittite el gaban.
5.El mar che cresce e con la sbima assè,
 pi del so purpio l’azzuro turchin
 dà l’ora de sier Rocco a i prè salè.
6.El rizzo tra do buse, dal lò che
 l’arpassa l’una el vento tirerà,
 e queste è conse vere e sprimentè.
 
 
 3. I segnale del bon tempo
1.Se l’arco elto in lo ciel c’ha vin e pan
 daspò la pioza sborirà de fuora,
 cava el to zupparello e po laora.
2.St’arco, c’ho menzonò, se on nasce el dì
 seanto sera vêr se legherà,
 el tempo sarà bello e gratià.
3.I barbastriegi che zolerà a schiappo
 e pi denanzo sera che i no ven
 promette tempo bon e te ’l manten.
4.An i bo che s’arponsa dal lò zanco
 e ’l ciel rossin bampò seanto sera
 g’harrà bella doman, me dise Franco.
5.Castron e bicchi che tende a montare
 piegore e cavre si prometterà
 che ’l dì drio sarà bon da laorare.
6.Le gru che fa per derto el so camin
 senza vêrse da cerca o sea da drio
 xe struoleghi del tempo bello e fin.
7.El sol che lieva e no g’ha niole a pe
 e co ’l trotta a sto muò ai so tiezon
 a gi huomeni darà buone zornè.
 
 
 4. I segnale del tempo rio
1.Se no zola da lunzi a le carase
 l’ava, on la ten a un cera immielà,
 te verè che ’l mal tempo tornerà.
2.Se i barbastriegi si starà ascondon
 e gi aseniegi scorterà le regie,
 farà rio che doente el tempo bon.
3.Denanzo quando i bo se lecca i piè
 e se i magna inviò e dal lò destro
 se colga, el tempo rio sborir se vé.
4.Quando i castron tra iggi a battagiare
 e saltuzzar se vé, e i cornacchion
 gragia la sera assè, harron que fare.
5.Se i gaggi in t’i ponari inanzo l’hora
 la notte tende a far cucurucù,
 la doman che ven drio no se laora.
6.La luna con tre circhi scurrentè,
 l’ocche che de contugno e ciga e zola
 ne fa saer che ’l burto tempo è in pe.
7.Sole che in lo levar sea cercenò
 de nuvolare a cerca, osieggi a frotta
 che staghe, slaina el bon tempo è muzzò!
 
 
 5. I segnale de scalmanella
1.Quando tira el schiantizo in bel seren
 e i cuorvi contra el sole arve el so becco,
 caldura con poer de trotto ven.
2.S’te verè i gallavron anar la sera,
 l’acque de prè, de valle e de pallù
 fumar, el caldo te farà anar nù.
3.An le mosche tra elle zugolando
 su la bass’hora a frotta, quando el sole
 s’imbusa, dise: harron el caldo grando.
4.E se i buzzò puoco denanzo al scuro
 svolazza su i cortivi e per robare,
 fegiuol, dal caldo te no sì seguro.
 
 
 6. I segnale del ferdo
1.El ghiazzo, che dal vento è frabicò
 on leva el sole, insegna che ’l sarà
 el ferdo longo e i fime azzielerà.
2.Se i rusignati ch’è desmesteghè
 cante e quî ch’è salbegi taserà,
 el sarà ferdo e gnieve pur assè.
3.Pollo de inverno, che zole infogò
 e rosso al muò de ’n homo imbriagon,
 laga el ferdo da drio per agno muò.
4.Le stelle schiarezè tra bel seren
 che fa caire le so moccaruole
 par che le cighe: dromi, el ferdo ven!
5.Se gi anneruoti cerca acque maore
 on no se ziele e al mare se ne va,
 sarà de longo ferdo un gran brusore.
 
 
 7. I segnale de gnieve
1.Co l’aire se veza intorgolà,
 slaina col ferdo la nuvola bianca:
 grossi fiocon de gnieve cairà.
2.Nuovola bianca incontra el damatin
 la sera d’invernà per du e tre fiè
 prenuostega la gnieve è chì vesin.
 
 
 8. I segnale de ghiazo
1.Venti che sbufa dal lò [on] nasce el sole
 fa prenuostego: è zielo ai contain,
 e no ve vendo, frieggi, o berte o fole.
2.Se la rosà no se verrà caire
 (pur che no sea el vento la cason),
 e ferdo e zielo te farà stopire.
 
 
 9. I segnale de tranquillitè
1.Co ’l troneza e schiantiza assè inviò,
 se i venti frema el ven tranquellitè,
 e xe bon barchezare i prè salè.
2.Se ’l dolfin ch’alde ontiera i sonaore
 tomboleze in lo mar co ’l xe abavò,
 tranquellitè ne rensirà daspò.
3.Se la luna da cerca harrà un cerchiaro
 che in brulle, frieggi, pianamen si vaghe,
 a’ g’harron el dì drio bel tempo e araro.
 
 
 10. I segnale de tempesta
1.Co ’l susinaro farà furti assè,
 co giacumetta in ciel se farà vêre,
 te harrè, villan, tempesta in quella istè.
2.La luna dai cerchiari intorgolà
 la manaza; se gi è verdi e spezè:
 maor tempesta dal ciel cairà.
3.El tron col vento del levar del dì,
 o col vento che ven dal lò da sera,
 chiama tempesta a frasellar le vì.
4.La nuovola ch’è bianca in te l’istè
 e che ven con potintia e destrution
 porta el mal che ne ten deroinè.
5.Bo e piegare che raspa co i peale
 la terra, e s’un de contra l’altro sta,
 fa crer c’harron tempesta, disea Nale.
 
 
 11. I segni de sitte
1.La cendere sgionfà sul fogolaro
 e i carbon impigiè che schiope an iggi
 fa che la sitta coe, disea Pittaro.
2.Nuovola bianca al muò del grombiale
 de la me Nina in aire sì fa vêre
 che sitta e fraza si farà del male.
3.Co ’l troneze la sera stragnamen
 prenuostega le sitte ch’a’ g’harron
 in l’aire sconquassò che n’è seren.
 
 
 12. I segnale de tron
1.L’arco, che g’ha per entro e pan e vin,
 dal lò del sol che muzza on ’l è aspiettò
 sborisce el tron che fa dar volta al vin.
2.Nuovola, che somegie na vesiga,
 ha tron robesto, stragno e sottil son,
 fa spauragia a chi muzza la faiga.
3.Se te verè che le se corra drio
 frotta de stelle col so cimegare
 s’aldirà fra puoche hore el tronezare.
 
 
 13. I segnale de tarlamuoti
1.Quelle acque che se intorgola tal fià
 senza cason e ten l’aldor del sale
 e puzza fuor del crere, elle el farà.
2.Se ’l mar sarà co è l’uolio e ’l cielo an lu
 senz’òra in muò che ’l no legne gi osieggi,
 el tarlamuoto sborirà de su.
3.Clipesi de pianuotti e ’l clipessò
 on ello fa l’ombria, vêr se porrà
 che ’l tarlamuoto salte in parentò.
4.Pollo pi dì che n’habbie el bel lusore
 e senza nuovolazzi al so galon
 prenuostega el tremoto con remore.
5.S’te verè senza venti gran bonazza
 d’aire, che pi misi tiegna duro,
 dal tarlamuoto te no sì seguro.
6.Osieggi coi nemal da quatro piè
 che laga on ch’iggi bita, o stalla o gnaro,
 mostra el tremoto che lunzi no xe.
 
 
 14. I segnale de giacometta
1.L’agiere deroinò fa giacometta,
 caldo e seccurra si l’ha inzenderà,
 sa far del male, co disea un poleta.
2.La desdrusion del ben c’hagon chialò
 la noriga a muò mare on che la sta,
 fin che ’l so fuogo sea deroinò.
 
 
 15. Zò que la prenuostega
 La giacometa co se vé novella
 slaina: i reame cambierà paron.
 La g’ha de muorti pina na scarsella,
 de re, de imperaore e de baron.
5La chiama i muorbi, co disea Borella,
 e le roesitè coi battagion.
 Mi no la vorae mè vêr sul Pavan,
 che la vaghe in Piruopia ai Sgrafacan!
 
 
 16. I segnale de bona sason.
1.Co g’harron gnieve che ’l ferdo manten,
 quando stagon sui stizzi e purassè
 spietta na bona frua l’istè che ven.
2.L’invernà che sea muogia per la pioza
 contugna farà ricca e darà hanore
 e utelitè a la sason dei fiore.
3.Co la gnieve xe granda e fa el poere
 da per sora i campitti e valle e prè,
 la spiga furterà pi del doere.
 
 
 17. I segnale della calestria
1.La giacometa sotto el ciel che zola
 da polente inviò sera e matin
 fa calestria per deroinar la gola.
2.L’istè e la putta che g’ha i fiore in sen
 signorezè dal muorbio e ben bagnò
 fa calestria rabosa on che la ven.
3.Se ’l nuovolo d’istè contugnerà
 e ’l muogio che fa male e desdrusion,
 de furti e gran la calestria sarà
 e de menestra per i poverhom.
4.Gi osiegi che va a schiappo e scon lagare
 i gnari, che i ghe ten fra le boscagie,
 se in cittè e ville i ven iggi a bitare
 e far i fegiuoletti e le so nagie,
 prenuosteghi darà che del magnare
 sea calestria, e no ve slaino bagie.
 In sto dementre Gieson Dio lontan
 la scature da Tralia e dal Pavan.