Archivio digitale veneto

Pasquale dalle Brentelle, Recuordi ai contain

 

 

Recuordi ai contain o sea cettain hanorè
 
 
 

[1] L’hanorò Tomio Bolpe, seanto con mi al molin, disea: “O frello, no somenare col clipesi del sole o della luna, perqué o negun raccolto te caverè o malamen te arcogirè la somenza”.

[2] Vegnanto Tomasello con mi a Castel Baldo su la so cavalla cervata, el vegne a dire a sto muò: “Se Saturnio sarà in t’i portegale della Luna, pianta de gi elbori, che gi arpigierà ben”.

[3] Benetto Tartarello, faellando con cierti contain agnorante dei timpi del bruscare, ghe disea: “Se te bruscherè a Luna pina que daghe lusore sotto el Bo, Lion e Scarpion, né i sorze né gi osieggi darà fastubio alla vua”.

[4] Tuogno de Marco Cebeschin, que dasea d’albergo a Sandro Pigozzo spartio dai terratuori puoco lunzi dei Toischi, ghe insegné i timpi de tosar le piegore, diganto: “Tosa le piegore co la Luna cresce”.

[5] Anaganto i figiuoli de Merlo Cucco per somenare la fava, ghe insegné Tita Baldan co la se dê somenare e le utilitè che s’in cava, slainandoghe per stra. Disea questù: “Somenè la fava a Luna reonda e la lente daspò que la sarà smagrà”.

[6] Salvestro Taccon, che loamava el so terren pi ca de gi altri contain, diseva a cierti segaore que merendava sotto na nogara: “Frelli, loamè i prè de fevraro co cresce la Luna s’a’ g’hi desiero d’arsunar del fen a sbesefo per i vuostri nemale. Ma vogianto haer assè pagia e gran, loamè i campitti co la Luna vaghe calando”.

[7] Da un parezuolo da ben, c’ha lome Mengo Regiotto, a’ guagnî un consegio de sta fatta. Disea el viegio, che bitava in la villa de Scardovara: “Somena temporivo, perqué le raise farà pi figiuolame; qué el tardivo archiapò dal ferdo no pò figiolare”.

[8] Damo Casella, seanto de brigà con mi per anar a Piove de Sacco, disea: “In colusion, frello, ara ben la to possession, e loamela maormen, e somena al tempo bon, s’te vuò vêre marabelia. A Luna nuova que vaghe crescendo pianta e somena, perqué gi elbori s’arpigia miegio, e pi inviò cresce la spiga”.

[9] A Giomo Brianzo barcaruolo ghe fo insegnò da un miego e strolegaore da que tempo el se doea fiar del mare. Disea questù in sto muò: “Se te he da far el viazo per mare, fa’ che un strolegaore te dighe a que partio staghe i pianuotti, e ten in te la smalmuoria che Saturno no sea ello paron. Tamentre se questù sarà in la bona vardaura de Zovio, so figiuolo, te porrè fiarte”.

[10] Grottolo da Chioza in l’anar per barca al Cesenego disea: “Tomio, no te lagar imbarcare se le Gallinelle no monte, e se el Dolfin stellò se catte in t’i Sette Canton, o veramen la barca d’Arago habbia da fare in t’i diazzi che te vorrà spartire”.

[11] Arzonzea an de pi diganto: “Sea per montar Rion cazzaore, azzò que no se fonde la barca col barcaruolo, o pelota, con quiggi che ghe sarà per entro in lo mare. Sètu perqué? Perqué sti segnale co i se catte in t’i cattivi lò, i fa vegnire la dereana cagaruola a chi no se ’l cre”.

[12] M’ha pandù Griguolo Bottacin che i campi arè dega haere per traerso dei scolaore ben regonè e larghi de busa, azzò que le acque no se frema e muora sora el terren, ma le vaghe scorranto in t’i fossè o in t’i fime.

[13] Ho imparò da Perduocimo Fascina che i sulchi arè per la somena del fromento no dega esser troppo fondi, on te ’l butti, ma mezanamen; de muò che el no sea scoerto, e magnò da gi osieggi Se el gran sarà a fondo, el starà un puo’ de pi a nascire, ma el fremerà miegio le raise. A sto partio el ferdo, el giazzo, la gnieve ghe farà menor male. Ho rivo.