Archivio digitale veneto

Pasquale dalle Brentelle, I timpi da somenar

 

 
 I timpi da somenar gi hortale insegnè alla so Nina
 
 
 
 1. Zenaro
L.N.Somena dei spinazzi in te’l loame
 che per sotto e per sora sea ingrassè
 a sbesefo da penzarte la fame.
L.V.I puori e le latughe che magnon
 con el petteto, me disea Baldrocco,
 somena, s’t’he piaser che le cogion.
 
 
 2. Fevraro
L.N.In terra negra regonar se dê
 el capuzzo, ch’è bon con el porcello,
 e ’l persembolo vuole el grasso an ello.
 
 An la ceola che fa pianzer gi uocchi
 a luna nuova somena, Ninetta,
 perqué la vegnirà grossa e sprefetta.
 
 E zuche de le smesteghe a’ vuogio an
 che sto fevraro le sea somenè,
 e verze, che in bon bruò degora el pan.
 
L.V.La salvia bona da far salvià
 pianta con le to man, Nina serore,
 che del certuorio la s’arpigierà.
 Se te vuò d’agno fatta haer le ruose
 mittighe le to man, netta la busa,
 che le arvirà el bocchin belle e liose.
 
 An la fava se somena in sti dì,
 i bisariegi, i puori, el radichion,
 ch’alturia gi ammalè col beveron.
 
 
 3. Marzo
L.N.Insalata, basilico, fenuocchi
 ben loamè te porre somenare,
 e ben ogiè te le porre magnare.
 
 An la zucca, ch’è turca e s’intortegia
 con zò que g’è denanzo, nascirà
 se in terren laorò sea somenà.
 
 Aldi, morosa, la ceola vuole
 terren grasso e norio, perqué daspò
 t’harrè l’usura de grosse ceole.
 
L.V.Pesteneghe, radigio e le romane
 latughe, co le sea ben ingrassè,
 galder le te farà del furto assè.
 
 
 4. Avrile
L.N.Fasuoli da cornitti i sbore fuora
 dal terren, che sea grasso e laorò,
 e g’in darà le stara in t’agno lò.
 
L.V.Cogomberi, serore, a’ caveron
 dai nuostri hortale, l’insalata, e po
 le ceole da re nu guagneron.
 
 
 5. Mazo
L.N.Mazo norio dai fiore el ten donà
 le verze, che d’inverno ven magnè
 e alturia coi paruni la brigà.
 
L.V.La viegia luna ciga ai ravanieggi:
 terren regona de bona snatura,
 con boazza de bo te i farè bieggi!
 
 
 6. Zugno
L.N.Ingrasse ben la terra chi vorrà
 dei gruossi ravanieggi a pina man,
 che forti e buoni sea per l’invernà.
 
L.V.L’indivia, che col ferdo an ella ven,
 rizzuotta e bianca co xe el me collaro,
 somena, Nina, on ghe sea bon terren.
 
 7. Lugio
L.N.Latuga romagnuola e d’agno fatta
 somena, tosa, china che el xe istè,
 e con la gnieve te ghe n’haverè.
 
 
 8. Aosto
L.N.Di biè capuzzi, che te faghe hanore
 se vegnirà i to frieggi in parentò
 con sarà ferdo, somena in bon lò.
 
L.V.Per Pasqua verze, che sea da sfogiare
 e da far, Nina, dei capon senz’ale,
 a’ te darò consegio a somenare.
 
 A luna viegia pianta d’agno consa
 per inchina del bello e bon zafran,
 che liegra el cuore e fa zalle le man.
 
 
 9. Settembrio
L.N.Vuòtu spinazzi an ti, putta noria?
 Ingrassa le vaneze e la man destra
 somene per haer bona manestra.
 
 I persemboli an iggi butta fuora
 e fa raise e fuogie purassè,
 e per lo ferdo te ghe n’haverè.
 
L.V.La smisiagia de salata harron,
 Nina fegiuola, se ’l sea somenò
 in terren muorbio, grasso e regonò.
 
 
 10. Ottore
L.N.D’ottorre i bisariegi cazzè sotto
 farà, co sea el so tempo, smaravegia,
 la Gnua me disse, mogier de Ghirotto.
 
 Da quel santo ligò col so cordon
 dei garuofoli pianta i cuoresin,
 che bieggi i crescerà con aldor bon.
 
 Le scalogne gentile an elle ven
 per el petteto, e i pumi ch’è ingranè
 te farà hanore se i sarà piantè.
 
L.V.Pigia, Ninetta, la to vanga in man,
 affossa saoreza ch’è invecchià,
 pianta spigo, viole e torna a ca’.
 
 
 11. Novembre
L.N.Somena, putta, s’te n’harrè que fare,
 persembolo, ch’an ello in sta sason
 farà el doere, te darà el magnare,
 e pianta el gusmarin col rosto bon.
 
L.V.A luna viegia ficca in lo terren
 fava, fegiuola, e no trognar o rire:
 per le to man la scognirà rensire;
 e pianta an da sto lò salvia, che ven.
 
 
 12. Desembre
L.N.In sto mese azzelò dal lò de drio
 de gi altri, daspò l’herbe e ’l somenare,
 slarga le buse que se dê piantare,
 che gi elbori farà furto norio.