Archivio digitale veneto

Dialogo di Rocco degli Ariminesi

 

 
 
 - Vita, sier Ceco Bello! Don sìo stò?
 Vegnìo dalle Vegniesie così in pressa?
 Ascoltè un puoco. Pota, andè inviò!
 - Matio, bondì. El preve hal ditto messa?
5- Sì, sì. Mo disì un puoco, cancarazo
 ge magne gi ogi al preve e la prevessa!
 - Poh, s’te savisi quanto bel solazzo
 ho bu sto carnevalo, a la fe’ dretta
 te resterisi un fondo da tinazo.
10- Sentève un puoco quence in sta riveta,
 contème un tratto quello avì vezù
 e po anderon dove i tuxi n’aspetta.
 - A’ son contento. Quando zonto fu
 al Ponto de Rolalto, a’ restié morto
15tante caxe e tabiè ge giera su.
 Giandusa, sé pi bello che no è el porto
 da Lozzo, né dal Bagno e là piombò,
 longo, ritondo, elto, derto e storto!
 E quando fo de barca desmontò,
20a’ vêa tante botege, che a’ guardava
 che a’ parea una bestia inspiritò:
 chi comprava e vendea, chi bragagnava
 guxele, scufie, scarpete e cordele.
 Altro che no è el mercò che se fa a Pava!
25Botege, botegini e boteghele.
 vergine Cristo Mare e benedetto,
 quante bagagie, quante bisinelle!
 A’ torné indrio a questa man de dreto,
 là don se vende el pesce in Pescaria.
30A’ me smarî ben, Cristo da Loreto!
 Pesce pizoli e grossi e d’ogni via,
 certi musi e spini intavarè
 che me smeravigiava, in fede mia.
 Po vigni a longo i formagi salè
35dov’è quî speciali dai confitti,
 che tutti affatto a’ l’arì sbreselè.
 Torné a Rolalto, donde è quî banchiti
 con milanta milion d’oro e monea,
 che a’ ristié morto imbalordio co i viti.
40A’ caminava e sì no me movea
 tirando gi ogi quence quende in via,
 e donde anava nianche no savea.
 El me fo ditto ch’iera in Merzaria.
 Lèvera, che cason bene adornè!
45Cancaro, i val pure una tresoraria.
 Fazuoli, spiegi, sonagi apichè,
 scufie, capiegi, sonagi e fazuoli,
 scarpe, zuocoli e calce indivisè,
 peteni, libri, carte e tuogioli,
50ochiale, forbesiegi e candelieri,
 forbexe, forbexete e pontaruoli,
 cortiegi, cortelazi e cortelieri!
 A’ crezo che el ge sipia el paraiso.
 Conche, rami, sechiegi, stagni e fieri,
55coltre, schiavine, pignolò de griso,
 tutte le stregie de quella contrà.
 A’ me maravigiava e sì avea riso.
 E così caminando a’ fu rivà
 in su ’n prò grando, ch’è tri pianton
60con prie masegne dal pe impenolà.
 Pensa mo ti s’a’ restié un babion:
 a’ me voltié al reluogio che lusea
 che ’l parea gi ogi d’un gatto maimon:
 ge giera bichi e castron che corea
65intorno del reluogio inorpelè,
 gambari e scarpioni i me parea,
 e po de sora du nigri impalè
 c’un campanazo in mezo, che i sonava
 ora uno ora l’altro a smartelè.
70E po la chiesa a bo da man guardava
 con quatro cavalazi su i tabiè
 proprio con è Gatamelò a Pava;
 la giera tutta a prie impeltrigè,
 che, se no magne mè, ’l è ’l bel pecò
75andarge sora habbiando i piè infangè.
 El ge giera una bestia lì apicò:
 i l’ha pigiò in Levanto de Turchia,
 per smaravegia in t’un muro ficò.
 I me pareva miegi, in fede mia,
80tanti huomini che anava, e sentî dire
 che i giera quigi de la Signoria.
 Quando pi avanzo fu, criti sbasire
 a vêr quelle colone ove i ribiegi
 cani mastini i se ge fa morire.
85E po quel fiume grando co i burchiegi
 grandi e pizoli, con tanti sogati,
 con tante bote, vezze e caratiegi.
 I corea in quelle soge con fa gatti,
 con certe so sbragese indivisè
90che al mondo mai no me poé dar pati.
 E burchi grandi e burchi intraversè.
 I cria, i sbraise che non e’ vezando,
 Matio frello, te no ’l crerisi mè.
 Varda, Matio, s’i me ficase in bando,
95pur che stese a Vegniesia, l’è sì bella
 che n’arave paura de Rolando.
 - Mo su, lason da parte sta novella,
 va’ drio, di’ de le tose se l’è belle
 e s’t’he fato il bordelo o la bordella.
100- Sì, sì, te ’l dirè ben, a le vagnelle!
 A’ g’he imparò parlar vignician:
 Astu magnao figao o anguelle?
 Orbentena, me volsi a bo da man
 e s’intrî in t’una porta in t’un canton:
105i feva tic tac toc tic tac toc tan.
 Oh, frello, i giera homini in preson,
 i feva smozanige co i martiegi,
 che da fastudio a’ me voltî il magon.
 A’ vigni fora con fa quigi osiegi
110c’ha vezù il mégio e sì n’in pol beccare,
 se ben i lo guarda e che i se ge fa biegi.
 Mo adesso adesso criti ben crepare,
 che a’ viti el Bucentoro che anava
 con tanti homini e donne a sollazzare.
115Un tabiò grando, che se ravoltava
 con fibioti e con trombe squarcè;
 a longo de quel pozo i pasezava.
 Viti del dose la paternitè,
 quel valentomo misser Andrea Griti,
120che se dirà de ello sempre mè.
 Oh quanto ben ’l ha fatto a i poveriti
 al tempo de le guerre sul Pavan,
 quando se doperava sì i schiopiti!
 Me misi a caminar po a passo pian
125don sta le peccarise del pecò
 vestie de velù, raso, tafetan.
 Medio de Cristo, e’ fu presto tocò
 in t’un viseto rosso co è un butazo,
 che le manine in sen m’avea ficò.
130A’ giero imbavò como un asenazo.
 De Dio, la me robé la borsa e ’l tasco
 fazanto vista d’aver gran solazzo!
 La disea: «A’ muoro. Aiàgame, che a’ casco».
 Ah, ge vegna la lova e ’l mal franzoso,
135m’avésela lagò la borsa almasco!
 E vegné c’una ronca un so braoso,
 perché a’ criava e sì volia i dinari,
 e su la via me fé corer de zoso.
 Ella stea a un buso e sì dixeva: «Ari,
140rustego scortegò! Vistu, a sto muodo
 a’ vegnè quence! A’ vuogio che t’impari!»
 Sì che, frello Matio, a’ restié nudo.
 Con pi bestia che suoldi fu partio,
 inscusò, inspirtò, zagurò, ludo.
145Questo fo el primo dì, sia laudò Dio.
 El dì secondo, a zò te smeravegia,
 tornié a San Marco e me misi a guardare
 quel bel palazzo ch’è tirò sì ’n stregia,
 con milanta milion de miliare,
150finestre, viri, busi e coloniegi.
 Pensa s’a’ me poea smaravegiare.
 De soto el portegale co i peniegi
 i fa forcieri e casse indivisè,
 che non crezo che al mondo sia i pi biegi.
155E così alzando gi ogi stravisè
 viti un torazo grando inorpelò
 con le cubie in la cima strisolè.
 In cima un agnol giera impenolò,
 d’oro che luxe, e no me so pensare
160como tanto elto el ge supia svolò.
 A’ me missi pian pian a caminare
 e sì scontrî missier Piero Rolando,
 che crezo che ’l volea anare a disnare.
 Co ’l viti, presto a’ me vignî voltando,
165a’ ghe fié de beretta e un repeton
 e dissi: «Missier, vobis me comando».
 O Dio, non viti quel bel omazon
 del Barbarigo, che fu capitagno,
 che a gi usurari i fea cagar stropon!
170Questo a Piero Rolando fu compagno,
 che el se dirà fina che Pava dura
 de quanto honore che i se fé gran guagno.
 In prima al verbon caro e a la misura
 i studiava a Pava gi usurari,
175ma questi du ge fé de gran paura.
 I smarazè sì forte quei fornari
 che i cagava stropiegi, a’ te so dire;
 né troppo miegio i fea a’ i fontegari.
 Se ’l Barbarigo non vegnea a morire
180o che Piero Rolando stava a Pava,
 a’ poivino Cristo beneire.
 Quel Dio che ogni pecò del mondo lava,
 Pare e Fiolo e Spirito Beneto,
 che fa nasser pizuoli, sorgo e fava,
185n’insegne tante gratie e tal secreto:
 così co ha dò a gi oxiegi quel fenice
 c’ogni cent’ani torna un ponzineto,
 fazza sto viegio c’ha doa milia fice
 vegna un putato de quatordes anni
190e vegne a Pava e spo saron felice.
 A’ saron fuora de tutti gi afanni,
 a’ g’aron pi dinari che n’è fava
 e pi morbin che no ha el preve Gianni.
 A’ tornié indrio e in qua e in là guardava,
195don sé i fornari viti un’ostaria
 e prestamente dentro a’ me ficava.
 Tusi un certo cotal de malvasia
 e pan sbafeto, che giera afanò,
 e scomencié a magnare, in fede mia.
200In quel che l’hosto si fu sluntanò
 a’ corsi via digando: «A questa foza
 gieri le vache m’hebbe sasinò!»
 Vignî a Rialto, sotto quella loza
 do’ è tanti zentilomeni asentè,
205che i parla de Baruti, Sandria e Chioza.
 Trovié una barca che aveva asiè,
 che volea vegnir verso Pava bella,
 e prestamente dentro a’ me sentié.
 Con fu a le Zafugine, o’ la Brentella
210è legè una rapegara che i la tira,
 no so a che muodo, a muodo sia graela,
 i dise: «Aisa, tove, guarda, mira!»
 I voa un certo argagno co i stangon
 ch’a’ g’aea paura, e sì i me fasea ira.
215La barca anava elto in gatolon
 e po, ch’è che no è, ella se messe
 a corer sapochiando de sbrison.
 Deh, Cristo de la Mare, cento vesse
 el me muzé da scagaita che havea,
220talmente forza el fo che ogn’hom ridesse.
 A’ m’agrizava che tutti ridea
 fina che vegnî a Pava; lì al Portello
 el barcarol i dinari volea
 e ’l me volea tuore el gabanello.
225Mille fiè le putane maledia
 e ’l me fo forza lasarghe el cortello.
 E così, frello, a’ me son meso in via.
 Pensa mo dal magnar s’a’ son de vena.
 Adio, Matio.
230- Adio, Ceco, anè via,
 m’arecomando, hormai ’l è hora de cena.