Archivio digitale veneto

Poesie politiche

 

 
 1
 - Cancaro, Duozo, gi ha ben strapacè
 in Trivisana i nuostri cagariegi!
 Tuoge mo su, perqué gi è stà rubiegi!
 - Èl vero, caro Nale?
5- Cancarè!
 Aldi, el me pare che i s’havea acordè
 cum quel da Citaela e a muò osiegi
 gi andea cagando tutto ’l dì i buegi,
 tanto che ’l Gritti gi ha a so muò gratè.
10- Me piase ben. Mo a che muò èla andà?
 - Mo i straliuoti si gi andé afrontare
 e de fato a muò puorci i sbaratà.
 Da bià quelù che polea po muzare!
 E tal che è corso inchinamentre a ca’
15senza vuogia de ber né de magnare.
 Chi n’ha possù muzare
 romase morto o veramen prison
 com fé el Beraldo e assè altri poltron.
 - Laldò sea san Broson
20zà que ’l è stò pigiò Ceco Berarldo,
 che ’l crea esser el paladin Renaldo,
 e sì è un gran ribaldo!
 ’L andarà pur sta botta in Picardia
 sto traitore can, biestia sbecia!
25Me piase, a la fe’ mia,
 perqué sti cagariè volea sbravare
 e no ha i rubiegi pur pan da magnare.
 Vage pur a cagare
 su la so insegna che i mati ha levò,
30sea de cornegia, gazuola o buzzò.
 
 
 2
 Crietu mo che, la pota de sen Bruson,
 vuogia che sepian i ben sbertuzè?
 ’L è fato el bando a Pava per contrè
 che ’l ne se porte arco, ferze, bolzon.
5E’ ne sè ch’i citain, maffé un carbon,
 ha fatto un berlengazo, a’ son de fe’
 che i nuostri pare el no s’aldisse mè.
 Duoh, el n’have el bel pascolo el paron!
 ’L è per forza de lettre a muò da villa,
10el par, maffé, che ’l sipia un nostro pare
 che daga la giandussa a chi fé el bando.
 A’ ge meterà ben pegno una anguilla
 ch’i ne ven drio nomè per ascoltare
 s’a’ digon niente, e po i ne va scrivando.
15I ne va sbertezando
 e caleffa per sta via i nuostri pare,
 che ’l ge vorà un che i fesse impresonare.
 
 
 3
 El ge n’è un chiapo che n’ha bu del guagno
 del bando de le ferze che i fé a Pava.
 I n’ha pur cecolò un a muò rava
 e du altri ge n’è de smezenè al bagno.
5El ne méssia sì ben i piè un ragno
 con fea le man colù ch’i zecollava,
 e’ te sè ben dir, frello, che ’l s’agiava
 pur che ’l aesse habù a pe d’ello un compagno.
 I ge smagié la panciera cun i sponton
10e dége sul batesmo d’un roncheto
 sì burtamen che ’l caì del ronzin.
 El parse, frello, propriamente un ton
 sì dì ’l bel strozo, e trete un sì gran peto
 che fé spander a Ceco da paura el vin.
15El parea un mallandrin:
 una barbaza negra, i cavegii sparpazè,
 ’l harà metù in paura diexe bandizè.
 
 
 4
 - Adio, Tonin, dove se vien el me frelo?
 - Da Pava. - Che se ge fa? Di’ la veritè.
 - Mo i è da paro quaxi tuti armè
 e si ha levò l’insegna d’un oxelo.
5- La dà esser vegnua un bel bordelo!
 - Poh, se ge tien raxon, non digo mè,
 e sì te zuro, s’a’ no magna mè,
 che ’l suo signor par propio un matarelo.
 S’tu veesi, el par spuò un bufon
10con la zuogia d’erbazi e vischia in man
 in zuparel cun diexe toescon.
 El me par propiamen quel zaratan
 che solea vender balote de saon
 e po faxea bagatele con quel can.
15E i slanziman
 ge va criando mè drio per la via;
 Impirio! Impirio! Austria! Austria!
 - El fiò ge borri via!
 - S’tu veesi l’insegna che ’l ha portò:
20el par un gazolato mo anegò.
 - Deh, foselo apicò,
 da che staren soto un vexentin gato
 e soto la insegna de un gazolato!
 ’L è pezo, che ’l è mato!
25- E perzò levonse tuti a rumore
 e criom Marco! Marco! e non Imperaore!
 - Tasi pur, Salvaore,
 perché le cosse non pò star cusì.
 Veerase de bel fin qualche dì.
 
 
 5
 - Que struolico, Tonin, che te sì stò!
 - Perqué?
 - Te me diesi l’altro dì
 ch’a’ veerae del bel chin puochi dì.
5Cherdi che da pordhom te he indivinò.
 - Poh, Salvaore, chi harae mè pensò
 che Pava poesse star troppo cossì?
 Durar la non possea gran fatto pi
 pel governo de quel matto spazzò.
10Pi bello assè di nuostri cagariegi
 sarea stò a saver indovinare
 che deventar i doesse anchora osiegi.
 - Mia fe’, Tonin, che ’l giera an da pensare,
 perqué gi havea l’insegna, sti rubiegi,
15d’oselo, che quel fin i doesse fare.
 Gi imparerà a cantare,
 zà que gi è in cabia a muò de gazolati,
 sti traitor senza celibrio e mati.
 Mo morbo che gi abati,
20’l è assè pi bello un lion indorò
 ca in s’una peza depento un buzzò!
 
 
 6
 - Sètu ben ch’a’ te ’l dissi, o Salvaore,
 che le cose non possea star cossì
 e che te veerè de bel fin puochi dì
 senza levar per zò tutti a remore?
5- Tonin, da para el me crepava el cuore
 che Pava per cason te sè de chi,
 de quî rubiegi can che l’ha traì,
 lassasse Marco per l’imperaore.
 - Sta’ mo de bona vuogia, Salvaor frelo,
10che quî toischi e citain armè
 che havea levò l’insegna del oselo,
 San Marco gi ha sì pisti e scaturè
 che i no ge inzergerà mo pi el cervelo
 e pi che mè sarem in libertè.
15- Mo se no magne mè,
 che ’l sarae stò pur gramezoso fatto
 che Pava fosse stà sotto d’un gatto!
 - De quel zarlatan matto?
 No ge pensar, che ’l no ge varga mo
20troppe doman che te ’l veerè picò,
 e chi l’ha prisiò,
 che ’l fasea andar urlando per la via
 Impierio! Impierio! La Stria! La Stria!,
 com se ’l foesse ’l messia.
25Te veerè el bel menar de gambe!
 - An an,
 a l’avanzo sti traitori el mal drian!
 - Que ha a far sti slanceman?
 Se sem buoni marchischi, al manco haron
30pase, habondantia sempre con rason.
 
 
 7
 - Hetu intendù di nuostri cagariegi?
 - Que cosa?
 - La maor te aldissi mè.
 Pota, n’ègi gran parte deventè
5biestie?
 - Que biestie?
 - Mo a muò osiegi.
 - Deh, per to fe’! Deh, mato, va’ ai bordiegi!
 - ’L è com te dige, s’a’ no magne mè,
10e s’te no ’l cri, anchora te ’l veerè,
 che gi è ive in gabia a muò de biè storniegi.
 - Chi ge gi ha metù?
 - Mo la Segnoria.
 - Mo lieve mo l’insegna del oselo!
15I se l’ha ben nonciò, a la fe’ mia.
 Chi ge dà da magnar, di’, caro frelo?
 - Poh, da magnare i ge n’ha a la polia,
 perqué gi è in t’un granar pin de granelo.
 - I morirà, Tonelo,
20que gi è aluchi e magna carne e no gran.
 - Gi è deventè columbi toresan.
 - Questo è pei slanceman,
 e la so insegna è pur d’un alocazo.
 - No, l’è de colombo matarazo.
25- Deh sì, l’è d’un cazo!
 A’ te sè dir che gi è deventè aluchi
 e parte d’igi zà gran tempo cuchi.
 
 
 8
 - Oh morbo, Tuogno, gi ha pur apigiò
 a Isola de la Scala el Mantoan,
 che in secorso vegnia dei slanceman!
 - Cancaro, frelo, i l’ha ben achiapò!
5Cope fiorin, ’l ha ben donca guagnò
 mo a volere desfar i Venitian!
 El so pensiero è andò indrio man.
 - El n’è gran fato, ’l ha mal strolegò.
 El disse una fià a un da ca’ Valiero
10che per agosto el se volea trovare,
 dige, in Veniesia armò sul so corsiero.
 - El ha falò de puoco a indivinare.
 - Dige, de assè, che ’l vignerà leziero
 d’arme e serà menò in l’orne a chigare.
15E ho sapù indivinare
 che, co ’l nostro lion se dismisiava,
 gramo quellù che po ge contrastava.
 Cossì cum ’l ha habù Pava
 senza remore, ’l ha habù an sta vituoria.
20Queste en cose da farge gran smelmuoria.
 
 
 9
 - Che te ge pare, Nale, frelo caro,
 di nuostri ver signori venician?
 Hagi stugiò, an? Ègi sleteran?
 L’è una gran cosa, in fe’ de san Slazaro!
5Mieriti mo portar la pel de varo?
 Hagi celibrio e ogni cosa a man?
 Te par ch’i gi ha atrazò el Mantoan?
 Cherdi ch’i pigia i lievori col caro.
 Bastanza che gi havesse stugiò
10luorica e filuorica naturale
 e in teluorica i s’haesse asdotorò
 e po in rason zoile e scriminale,
 e che mai d’altro i no s’haesse pensò
 se no de struolicaria celestiale,
15te dighe a la fe’, Nale,
 Sinica e Stoten sape tanto mè,
 e s’te no ’l cri, ancora te ’l veerè.
 - Madio, sì ch’a’ no ’l sè,
 ch’a’, se ’l non foese stò i traitore,
20de questa guerra gi havea grand’hanore!
 Tasi pur, Salvaore,
 che al so despetto anchora i venzerà
 e i traitor da duogia creperà.
 
 
 10
 - Grigol, tu non sè de quella genia
 de quei toeschi, ch’era torno Pava?
 Tutti è partii e, se pi gi aspettava,
 forsi n’haria bu da torse via.
5- Vada col mal che Dio ghe dia!
 Mo chi gi aldiva, tutti si laudava
 che manco pochi dì i la pigiava,
 ma i poveregi i andò alla beccaria.
 E quegi che se gi ha voiù accostare
10gi è restè morti lialò in quel fossò,
 ch’i n’ha trovà la via più de tornare.
 Ma ’l Caodevaca, che gi ha conseiò,
 ch’in pochi dì el ghe la volea dare,
 quel cao de bestia è romagnù scornò.
15- Se dise ch’i l’ha apicò.
 - Fosse pur vero e no fusse una zanza,
 lu e i rebiegi tutti che gh’avanza!
 Mo gh’è buona speranza
 che qualche dì i la porà slongare,
20ma no crezo i la possa scapolare.
 - Deh, lassa pur andare
 e infin de pochi dì tu vederè
 a mancarghe la terra sotto i piè.
 Stagon alliegri omè,
25che presto insiron de tanti affani
 e daron dogia a i francesi cani,
 ne refaron li danni
 «cento per ognuno accipiato»,
 co dise ’l nostro prieve qualche tratto.
30- Pur pian, non sì difatto.
 In sto mezzo alla villa ne andaron
 a lavorare nostre possession.
 Horsù, Begin me buon,
 andagon pur cantando a man a man
35che Dio ne spaza da sti tanti can.
 
 
 11
 Gi è partù quei lanziman!
 Allegronse tutti, friegi,
 al dispetto di ribiegi,
 ch’i se dié magnar le man.
5Gi è partù quei lanziman.
 Oh, gi ha havù el bel honore
 quella zente della Magna,
 digo ben, l’imperaore,
 Franza, Frara, Roma e Spagna.
10I ha habù el cancaro ch’i magna
 a vegnire sul Pavan.
 Gi è partù quei lanziman.
 Forse mo ch’i n’ha assunè
 per mostrar della gaiarda
15sora i morti ch’è accolgè
 chi de spa, chi de bombarda,
 chi dal fuogo che gi arda
 tutti quanti sta doman?
 Gi è partù quei lanziman.
20Sì vegnù pur tutti in frotta
 per voler Pava pigiare,
 tornè indrio pur questa botta,
 no la stè più a duniare,
 se n’haì vogia de lassare
25la forma del gaban.
 Gi è partù quei lanziman.
 Che farà mo i citaini,
 quei de Pava ribellè?
 I starà tutti topini
30che ’l pensier g’he andà sbusè.
 I Toeschi gi ha lassè,
 gi è partì po col malan.
 Gi è partù quei lanziman.
 Tornaron a i casamenti
35e poron pur semenare
 orzo, spelta e di fromenti,
 far del vin e anche arare,
 e poron pur lavorare
 sora i monti e sora i pian.
40Gi è partù quei lanziman.
 No aldiron pi dir Impierio!
 nianca Laustria! in sti castiegi,
 ’l è pur tò gran vituperio
 ai toeschi matariegi,
45che se dié magnar le man.
 Gi è partù quei lanziman.
 Marco! Marco! tutti cria.
 Viva Marco con gran gloria,
 viva la so Signoria,
50che per tutto harà vittoria.
 Ai nimisi può la moria,
 chi non magna mè pi pan.
 Gi è partù quei lanziman.
 Aldiron megior novelle
55che n’è stò per lo passò,
 Marco harà città e castelle
 assà pi che non lassò.
 Mo faron po campanò
 din din din din don din dan.
60Gi è partù quei lanzimen.
 
 
 12
 Barison frelo, el me serà stò a caro
 averte scrita qualche letereta,
 ma la sason sé andà sì forte streta
 che n’arà possù scriverte un noaro.
5El no s’ha aldù sonar un zugolaro,
 né se sé andè né a chiuso né a zoveta.
 Ognun havea su gi uchii la bareta
 co s’i ge fosse morti i buò e ’l boaro.
 Adesso a Chioza ’l è vegnù el Bagion:
10’l è incatigiò re, papi e signoria,
 e senti far legreze a puto egnhon.
 I ge fa fuogi, i brusa becaria,
 i scampaneza, i fa spricission,
 gi ha vestù de velù sina la pria,
15l’è vegnù malvasia!
 I franzosi e i toeschi va via in freza,
 Veniesia egnhon scompissa d’alegreza.
 
 
 13
 - Hetu sentù, Beneto, quel remore
 che se fa in Pava scampanando via?
 Frelo, dimel, se ’l sè, consa che ’l sia,
 che de saverlo me sbacega el cuore.
5- Tofano, e’ te ’l vuò dir con paxe e amore:
 stando in la piaza de la Signoria
 a’ sentî sta doman far una cria,
 a’ crezo da Zanin comandaore.
 A’ butî fuora le rechie de fato,
10a’ sentî dir: «Lodovico re di Franza
 insieme con San Marco ha liga fato
 e tuti du armè con la so lanza
 i s’ha promesso mantegnir el pato
 infin che durerà la so posanza».
15- Se l’è vera sta zanza
 te sentirè muzar toischi a furia
 fina in Toescaria criando alturia!
 - Oh te vegna la muria,
 a’ serem fuora pur de tanti osiegi
20senza de aver paura de rebiegi!
 - Orsù alto su, friegi,
 cantom una canzon da paladin
 al despeto de tuti i malandrin.
 - Una veza de vin
25a’ vuò che d’alegreza e’ strusiom.
 Tofano, di’ ’l tenore. Orsù cantom.
 
 
 14
 Cantom tuti in paxe e amore.
 De Dio Pare al nome sia,
 de la nostra Signoria,
 che ne cavi d’ogni erore.
5Cantom tuti in pase e amore.
 Marco! Marco! criom tuti,
 Franza! Franza! aliegramente,
 done, vechie, pute e puti
 festezando santamente
10può che il ciel ne dà tal fruti,
 scampanando de buon cuore.
 Cantom tuti in paxe e amore.
 I franzosi e veneciani
 tuti d’un come fradiegi
15vivan sempre in monti e in piani
 al dispeto de rebiegi.
 Dio mantenga anca i pavani
 che han San Marco dentro il cuore.
 Cantom tuti in paxe e amore.
20Questi son che puon salvarne
 da la piaga del pecò.
 Questi son che puon sanarne
 d’ogni tristo e rio mercò.
 Questi son che puol cavarne
25da nemici e da dolore.
 Cantom tuti in paxe e amore.
 Non se lassi d’alegrare,
 su, brigata, tuti quanti.
 A’ porem pur sbraxolare
30rengratiando tuti i santi,
 a’ porem pur sbalonzare
 con le pute a grande onore.
 Cantom tuti in paxe e amore.
 Su su, adunque, o zogolari,
35con le pive a meza gamba.
 Tochè su alto, pivari,
 con le calze nove in gamba.
 Sonè su, tolì denari,
 parè via con sto dolzore.
40Cantom tuti in paxe e amore.
 De nemici o de rebiegi
 non harom ma’ più temore.
 Alto donca tuti, friegi,
 via cantando da bon cuore
45e cazando i sbasavegi
 laldom tuti il gran Signore.
 Canton tuti in paxe e amore.
 
 
 15
 - Barba Quaioto, aldì bone novele.
 - Deh, va’ con Dio, e non me far dir male:
 tante novele e po neguna vale.
 Che viegna l’ango a ste lengue bardele!
5Se m’ascoltè, e’ ve le vuò dir bele.
 L’altr’ier giera a San Marco a pe le scale,
 vien un de quei c’ha ’l corno drio le spale
 ( se ’l non è ver, che mè pi no favele! ),
 e stando un puo’, mez’ora gnanche no,
10tanto quanto ch’a’ sem chive a parlare,
 sentî sul campanil far din din do,
 poi tuti i giesiò scampanezare,
 cum fuogi e cum lumiere far falò
 e tute le contrè perlumegare.
15A’ m’avi sì a legrare
 che ’l cuor me sbazegava in lo magon
 sentir in campanil far din din don.
 Andié da un me paron,
 ge domandié: «Mo que vuol dir, massiere,
20sto tanto din din don, fuogo e lumere?»
 El me disse el devere:
 «Sètu che festa è questa che fazon?
 Per la gran pase tuti s’alegron».
 - O Nale, frel me bon,
25quanta alegreza ch’a’ me sento al cuore,
 che a i me dì non sentî mè la maore.
 Dìme tuto el tenore.
 - La pase l’è stà fatta a dirte el vero
 e de i soldè no n’averen pensero.
30- Sì, adesso che son legiero,
 che d’ogni banda son stò sachezò,
 fuorsi ch’adesso un po’ me refarò.
 In prima i m’ha robò
 i puorci, i buò, el caro col versuro,
35la bote co i tinaci, anche el vituro.
 Mo ’l me sa ben pi duro
 di leti ch’i ha robè, de le letiere,
 e pezo che i m’ha tolta la mogiere.
 Te par queste streliere?
40Ma m’he desmentegò d’ogni zavata
 com te m’he dito de la pase fata.
 - La roba se rescata,
 barba Quaioto, e averen del ben
 per fina che San Marco se manten.
45Tuti ne refaren
 al despeto de tuti i traitore,
 trionfarem a nostro grande onore.